聖保羅華斯高做「大」騷

猪拉多纳

31/07/2011
文： 亨格比利

近年有唔少巴西球星返鄉下搵食，今季就有朗拿甸奴同艾蘭奴兩大星級猛將。今晚聖保羅大戰華斯高，亦都有李華度同P祖正面交鋒，雙方火力一樣咁堅，捧1.75倍大啱數。（開賽時間：周一凌晨3:00）


今季新加盟嘅路爾斯法比安奴早兩日又再做手術，唔知要抖幾耐，今季仲未幫新東家聖保羅披甲，不過大家又唔使擔心喎，由李華度、盧卡斯洛迪古斯同達高巴圖領銜嘅攻擊鐵三角威力十足，聖保羅近4仗就炮製咗11球，都咪話唔猛料！

李華度孭飛鬥P祖

進攻方面，聖保羅確實無可挑剔，但係左閘祖安馬當度同防中丹尼遜要停賽，教練艾迪臣巴迪斯達焗住要喺預備組提拔防守球員戥腳，防線有一定隱憂。


對家華斯高近4仗錄得3勝1和，自捧走巴西盃後明顯反彈，證明36歲老將祖連奴比南布肯奴嘅加盟起到幾大作用。考慮到華斯高係前列隊伍入面失波最多嗰隊，加上鐵衞馬斯奧卡列卡要坐波監，大家都係有前冇後，入波邊會少吖！