拜仁折翼炒唔起 Bayern Munich

猪拉多纳

01/08/2011
文： 蘇斯黑柴

德國盃今晚上演首圈壓軸好戲，德甲班霸拜仁慕尼黑作客對剛升上德乙嘅布倫瑞克，表面睇兩軍實力懸殊，但主隊目前狀態同氣勢如日中天，喺聲勢浩大嘅主場出擊，面對有魔翼列貝利同洛賓齊齊缺陣，變咗「折翼」嘅拜仁，有一拚之力，拜仁讓得太多宜捧對家，因為今場冇讓球盤買，建議將注碼分為三注，兩注捧3.7倍嘅拜仁「讓球和」，再補一注3.15倍嘅「讓球主勝」，只要布倫瑞克唔輸兩球或以上都有錢收。（無綫翡翠台周二凌晨2時30分直播）




大家千祈咪睇小呢隊布倫瑞克，佢哋係德國老牌勁旅，有悠久歷史同狂熱球迷，1967年仲贏過德甲聯賽冠軍，經過多年沉淪，上季喺德丙以大超班姿態稱王，拋離第二名嘅前東德老牌勁旅羅斯托克7分，重返德乙早已經抱有一定期望，但估唔到一升班就嚟料，目前聯賽兩戰全勝高踞榜首，贏過另一支慕尼黑市球隊1860同亞琛，兩仗都以兩球輕取對手，剛果箭頭甘比拿技驚四座，中場線嘅推進亦速度、默契兼備，實力去到邊仲係一個謎。




布倫瑞克今晚磨拳擦掌喺德國盃越級挑戰，睇往績佢哋過去喺德甲曾經五次主場對拜仁，戰績一勝兩和兩負，但每仗都打得激烈，從未輸過超過一球。


洛賓列貝利齊缺陣


德甲未開咧，拜仁喺狀態方面已差一截，佢哋季前踢咗兩項盃賽熱身，但面對漢堡、緬恩斯、AC米蘭同巴塞隆拿，法定時間90分鐘內竟然四戰未贏過，仲勁失7球，好明顯無論攻守都未Ready，尤其喺破密集方面顯得一籌莫展，今仗列貝利同洛賓同時缺陣，作客難望大捷。