洪禮賢講馬：係咪高一線？

猪拉多纳

　　唔甘心去做；做後唔甘心，都可以用嚟形容一段關係。事前明知那人信唔過，釋出感情去俘虜佢，預咗有效期短過坐港鐵由銅鑼灣去柴灣，唔甘心嘥咗份感情，但個心硬係心郁郁，想親身體驗吓那人嘅特質，徘徊喺去與唔去做之間，終日身邊嘅魔鬼同天使大打出手。

　　另一邊廂，被那人嘅吸引力無形咁箍住，知道係後果自負兼自殘，冇法子，硬着頭皮發展落去，冇耐「人去樓空」，身邊嘅天使，終日嚷着：「係咪呀，都話結果係咁，自己攞嚟衰。」

　　上述兩個例子放喺賽馬，其實經常會發生。就如「高一線」，上季初贏馬過程犀利（剛季三班1400米第三快），唔好計當時嘅前中段步速快定慢，係咪特別利追，總之，眼巴巴睇住佢喺直路由包尾冚上嚟過晒，極盡視覺享受！

　　經此一役後，繼續追，定係獲利後走人，認真難決定。追落去，平注都嘔凸好多（之後10場僅獲2P）。至此，個人有樣嘢諗唔通，嗰場二三名嘅「生生不息」和「金鑽龍華」，及後有本事夾埋贏3場（另有6個P），偏偏「高一線」係1W馬，究竟嗰場頭馬水準係咪高一線㗎？！

馬會賽馬節目主持　洪禮賢