法林明高順開有條路

猪拉多纳

03/08/2011
文： 樂比堅尼

巴甲周中開快車，明早上演七場賽事，高士路主場對法林明高。法林明高係巴甲唯一不敗之師，「細哨」朗拿甸奴返回巴西後如魚得水，近兩仗入四粒，今場難得受讓，樂比仔推介「讓球客勝」。（周四早上8時50分開賽）




巴甲球季踢咗約三分一，前列球隊鬥得難分難解，樂比仔最睇好係法林明高，因為眾所周知，巴甲最難應付嘅就係客場比賽，但法林明高依然處理得相當好，今季未嘗一敗，上周作客強敵山度士，喺落後三球情況下都可以反勝五比四，可見法林明高除鬥志強橫，仲非常夠運，相當有冠軍相。




法林明高今季能夠大爆發，最大功勞當然係「細哨」朗拿甸奴，佢今季已射入九球，目前喺射手榜領先，而其他隊友亦幫到手，好似堤亞高尼夫斯、迪維迪都踢到曉飛，入球板斧甚多。


高士路新帥效應過期


至於高士路早前易帥，聘請名帥辛坦拿領軍後出現過一段小陽春，但虛火過後近期又打回原形，近五仗輸三場，球員明顯唔適應密集賽程，今場要贏狀態大勇嘅法林明高談何容易？