皇馬操弗晒唔放過恒大

猪拉多纳

03/08/2011
文： 力奇

西甲班霸皇家馬德里今晚會喺天河體育場出戰恒大（馬會譯名：FC廣州）。主隊雖然喺中超保持17戰不敗，兼得主場之利，但3日踢2場對體力肯定係極大考驗。況且皇馬喺季前熱身賽從未留手，5戰全勝，主帥莫連奴擺明要操好班波挑戰巴塞，試問今晚點會贏得少？皇馬讓波出擊，1.37倍「讓球客勝」咪嫌熱，勝在穩陣嘛！（now632台及廣東體育周三晚7:45直播）




恒大今次落足本錢請「銀河艦隊」到訪，今晚點會唔派強陣出擊，同對手合演好戲達宣傳效果。之但係佢哋近排的確賽程緊密，前晚响中超先作客北京國安踢成各一平手，打完今晚賽事，又話要準備周末嘅聯賽。最慘係大軍前晚鬥完國安，即晚就坐包機返廣州，咁趕急都係為咗尋日出席主席許家印旗下集團嘅活動，頻頻撲撲唔攰就假。


恒大頻撲賽程密


冇錯，恒大陣容其實都算唔曳，孫祥、鄭智、郜林等都係中國國腳，外援梅列基同達里奧干卡一樣係級數極高，可惜係今次佢哋撞着嘅係全球最頂級嘅皇馬，差幾班又點砌吖？再者，被寄予厚望、身價高昂嘅巴西兵達里奧干卡，上月加盟以來，至今都未融入球隊，上仗鬥國安仲衰到末段抽筋，似乎連作戰狀態都唔多夠，都咪話唔得人驚！


皇馬三條A士哥保證


皇馬方面，熱身賽5戰全勝嘅皇馬，打遍美洲同歐洲都搵唔到對手，斷估都唔會衰喺中國啩！主帥莫連奴今季志切拆巴塞招牌，操到班波鬼咁Fit，今鋪都唔會留手。睇番佢哋連日練波踢分隊賽，主力陣容嘅10個位置都冇乜變動，前線三條A組合C朗、賓施馬同奧斯爾都係入波保證，「銀河艦隊」肯打真軍，要贏2球或以上有咩難度吖！