洪禮賢講馬：蔡廐「滄海遺珠」

猪拉多纳

　　蔡約翰由01年在港開倉，唔覺唔覺10季嘞，又唔覺唔覺贏咗6屆冠軍。呢個馬房有幾堅，唔使再「多費唇舌」。睇番佢過去咁多季嘅頭馬數量，冇乜邊一季頭馬唔多，最少已經數到06-07年度，只得32W，其餘嗰9個季度，必在50場或以上。

　　因為每季贏馬多，廐內兵力用得就用，「XX繽紛」一季7捷，雖然係季季會有類似例子，但斷唔會由幾匹「XX繽紛」，包辦晒所有頭馬！因而其他廐內成員，都會「眾志成城」，能夠跑得嘅，有得贏嘅，盡量去，就算嗰批係年紀輕輕嘅馬，唔會揠苗助長，一場半場頭馬，點都會贏咗先，上季甫出道而1W收手嘅（亦可能係實力所限），為數唔係少，譬如「和牛」、「競駿寶寶」、「多利皇」、「正榮」等等。

　　根據上述睇法，蔡廐馬如果喺一季之內係咁跑（超過10場以上），但又贏唔到嘅，可能唔係好多匹，不過又唔係搵唔到，好似「明燈」、「風力威猛」、「印度光輝」、「一路奇兵」等駒，已經符合多跑而冇得贏嘅條件。

減夠分反彈

　　上述呢幾匹「滄海遺珠」之中，目前分數較上季初減幅有十幾廿分嘅，有「風力威猛」和「一路奇兵」。今季會唔會係收成期，機會係幾大，起碼評分有so，斷唔會反彈唔到。

馬會賽馬節目主持　洪禮賢