巴西追擊巴拿馬

猪拉多纳

04/08/2011
文： 法比加輝

世青盃E組最後一輪賽事，巴西U20明早對巴拿馬U20。經過首戰略為失準後，巴西次輪終於踢番出「森巴味道」，全場控制戰局大勝奧地利三比○，盡現霸氣！巴拿馬實力比奧地利還要差，所以加輝預計巴西今場可再度大炒，續捧巴西「讓球主勝」。




（周五早上9時開賽）


巴拿馬同組最弱


雖然巴西今次未有召尼馬呢枚超級新星入伍，但巴西向來人才輩出，所以實力依然強橫，今屆就由國際米蘭小將菲臘比古天奴孭飛。巴西首戰遭埃及逼和後，球員似乎已逐漸入局，上場面對奧地利可以話完全控制戰局，全場射門21對4，而控球比率亦以巴西佔優達六成，最終淨勝三球已算留手。




奧地利面對巴西不堪一擊，估計巴拿馬亦會步其後塵，事關加輝都有睇奧地利首戰對巴拿馬場波，雖然兩軍踢成○比○各得一分，但其實奧地利在賽事中佔有較多優勢，只係埋門把握力較差先贏唔到，所以巴拿馬對巴西都好難頂得住，今場捧巴西「讓球主勝」啱數。


埃及可勝奧地利


至於同組另一場埃及U20對奧地利U20，加輝就睇好埃及可以輕取對手。正如頭先所講，奧地利對住巴西猶如細路對大人，完全冇得踢，反觀非洲兵埃及表現四平八穩，對巴西互有攻守，實力肯定在奧地利之上，今場大可睇高埃及一線，簡單捧主勝。