漢堡內傷唔夠揪 做完大手術

猪拉多纳

04/08/2011


漢堡今季搵咗阿連臣做體育主管，呢位前車路士青訓重臣上任後一切由零開始，球隊今夏放走咗門將路斯、後衞馬菲臣、中場薛羅拔圖、杜查奧斯基同箭頭雲尼斯達萊，呢批球員上季全部係球隊四線嘅領袖級人馬，阿連臣只係搵咗幾個喺車路士仲未踢起嘅後生仔頂檔，做完咁大手術，今季季初相信仲有排執。




漢堡新球季人面全非，阿連臣帶嚟嘅文切尼、謝菲布馬、哥漢托尼同沙拉年紀都好細，短時間內難適應球隊踢法，相信佢哋好大程度要依賴季前熱身賽踢到識飛嘅南韓小子孫弘民孭飛咯！