多蒙特主場開餐

猪拉多纳

05/08/2011
文： 蘇斯黑柴

德甲2011-12球季今晚開鑼，揭幕戰由衞冕冠軍嘅多蒙特迎戰漢堡，漢堡今季縮皮之餘仲人面全非，季初當然蝕底，餓足成個暑假嘅多蒙特主場出擊，以不變應萬變夠殺有餘，黑柴捧2.2倍「讓球主勝」。（有線61及201台周六凌晨2時30分直播）




漢堡今季大變天，上季陣中各線領袖人物，包括門將路斯、後防大將馬菲臣、中場大哥薛羅拔圖、國腳杜查奧斯基同荷蘭箭頭雲尼斯達萊相繼離隊，新加盟嘅體育主管阿連臣喺車路士挖來四名小將代替，呢批小將初嚟甫到亦欠缺經驗，好難即時幫到手，何況四人中謝菲布馬因傷缺陣，積高普沙拉未獲教練奧寧青睞進入大軍名單，哥漢托利亦只係啱啱傷愈上陣成疑，只得中堅文切尼確定正選，佢有冇能力取代馬菲臣領袖地位令人懷疑。




漢堡季前準備同熱身賽亦踢得曳，喺電訊盃決賽已經對過多蒙特一次，最終全場捱打輸○比二，德國盃首圈面對第五級別嘅弱旅奧爾登堡，都要幾經艱苦下至險勝二比一，而且防線漏洞百出險象環生，以咁嘅狀態作客韋斯科蘭球場凶多吉少。


電訊盃輕勝2:0


多蒙特人腳變動細，季初佔盡便宜，雖然有紐尼沙軒離隊，舒姆沙同巴里奧斯因傷缺陣，但日本王牌香川真司重拾佳態，整體戰鬥力依然強橫，唔計電訊盃嗰場二比○，佢哋近三次主場對漢堡全勝兼冇失波，其中兩場亦贏二比○，球隊向來領先後都會再爭取「燕梳球」買保險，唔怕贏咗一粒就收手。