荷甲洗牌晒你冷

猪拉多纳

05/08/2011


新一季荷蘭甲組聯賽於香港時間周六凌晨開鑼，今季荷甲最特別之處係出現教練大執位，18支參賽球隊之中有9支換上新教練，當中以朗奴、艾雲高文兩兄弟及老牌教頭阿祖安斯回歸最受矚目，到底各支球隊經過重新洗牌後會有咩大改變呢？


9間球會換新帥


今季9支換咗新教練嘅球隊之中，相信以朗奴高文回歸最多人談論。朗奴高文今次加盟飛燕諾，成為首個球員及教練生涯都効力過傳統Big3（燕豪芬、阿積士、飛燕諾）嘅荷蘭人。朗奴高文以往帶領華倫西亞、賓菲加等國外球隊整體表現只屬一般，反而執教阿積士及燕豪芬都曾經贏過荷甲冠軍，所以好多球迷都期待朗奴可以幫助近年積弱已久嘅飛燕諾重振雄風。




朗奴哥哥艾雲高文雖然個人成就及星味都比不上細佬，不過佢曾執教匈牙利國家隊超過兩年時間，就算未能協助該國取得任何獎盃，但領軍功力依然毋庸置疑。艾雲今次回歸執教中型班烏德勒支，憑佢經驗有力協助球隊打入前列。


阿祖安斯掌川迪


上季於煞科日輸波而衞冕失敗嘅川迪，今季搵來64歲教練阿祖安斯頂替前赴中東掘金嘅普荷美。阿祖安斯早年帶領阿爾克馬爾時曾榮膺荷甲最佳教練，之後改教波圖亦贏過葡超、葡盃等多項冠軍，憑其老謀深算足可令到川迪有力重奪失落一季嘅聯賽冠軍。