洪禮賢講馬：低分馬的幻想空間

猪拉多纳

　　市場上，低處未算低，高處又未算高，係舊到石器時代嘅定理！以為可以追落後、撈底，點知入市後再插落去，嗰刻唔cut lost，忍痛割「忽」肉，迅即被縛，一手蟹貨，跟住想拉低成本價，愈要去溝，愈係溝到火水，價格繼續跌，結果三五七年返唔到家鄉。呢段故仔唔係老作，除咗係自己當年經歷，有玩過細價股嘅朋友，也曾會有類似切膚之痛。

　　另一方面，趁高位諗住減磅「落貨」，嘩，去到52周新高，仲唔賣出大部分，正所謂止賺嘛，最多賣剩啲，博上多幾格，連汁都唔好嘥！可惜，命運之神係要同你作對，你嗰頭賣貨，下一分鐘升到爆錶，跟住幾日裂口高開，價格翻咗成個開咁滯。呢類贏唔盡嘅故事，亦唔會只得洪某一人遇過，幾乎做得股民，就有咁嘅心路歷程。

撈底冇着數

　　好嘞，咁喺賽馬世界，好唔好去撈底？撇開個別例子，如果大圍計數，都係算吧啦，唔好有太多幻想空間！根據上季暑假總評分之後，共有12駒被評20分或以下，呢堆馬裏面，上季有得贏嘅真係少之又少，只得「暗飛聲」及「賞心」曾勝，其餘好多係跑極都冇P咁退役，如「星域快車」、「馬霸龍」等等。之所以，對待今季那批低分馬，都係避一避先。

馬會賽馬節目主持　洪禮賢