皇馬大騷殺到天津

猪拉多纳

06/08/2011
文： 法比加輝

皇家馬德里「中國之行」第二場熱身賽，今晚在天津奧林匹克體育場對中超勁旅FC天津。由於要備戰西班牙超級盃，皇馬「中國之行」絕非講玩，上場不留情面狂數廣州恒大（馬會稱為FC廣州）七個一皮，大軍抵天津後又加時操練，隊長卡斯拿斯更揚言每場熱身賽都「打真軍」！縱然FC天津表明唔學恒大玩留力，但遇上全力出擊嘅「艦隊」，睇怕都難逃被炒厄運，入球大細中位數4.5球都捧大盤。（now 632周六下午5時45分直播）




皇馬上場對恒大嘅態度的確令加輝嚇一跳，事關皇馬本身實力已勝過對方幾班，而主隊又因為留力聯賽，早早換走大量主力離場，留下一隊「B隊」螳臂當車。不過皇馬竟一於少理，無論對正選定後備都係一個目標，就係盡情數胡，而教練莫連奴更加當正西甲咁踢，大幅領先下依然七情上面，真係估唔到皇馬會咁認真。


莫帥加操唔似留手


事實上，皇馬完成「中國之行」後，大概還有一星期時間就要踢西超盃首回合，皇馬上季在聯賽、歐聯兩大錦標都衰喺巴塞隆拿手，一向唔服輸嘅莫連奴，今季當然先知先覺，喺熱身賽谷盡球隊，務求憑較佳狀態搶得頭啖湯。所以皇馬喺「中國之行」就特別認真，抵天津後首課操練，莫帥就由原定一小時訓練加操至一小時四十分鐘，絕對唔容許球員懶散。




雖然FC天津已經表態，唔會好似恒大咁為聯賽而留力，今場會全力以赴，但既然「中超一哥」恒大上半場出主力都輸三粒，所以加輝認為主隊都好可能步恒大後塵，今場捧入球大。