射手着晒火史浩克益大「加」

猪拉多纳

06/08/2011
文： 力奇

德甲首周即爆重頭激戰，「雙史互片」好睇過戲！兩支褪色勁旅史特加同史浩克04上季都跌入下游位置，今季齊齊博翻身冇得留手。最緊要係主隊史特加後防成籮傷兵，客軍史浩克又冇咗鋼門紐亞，大家都不設防，1.78倍入球大最抵玩！（有線61及64周六晚9:30直播）




上季排12嘅史特加戰績令人失望，教練拉巴迪亞早前受訪嗰陣，拍晒心口同球迷保證今季成績必有改善，信唔信得過冇人知，但力奇認為佢哋嘅鬥志一定無疑問，落到場唔會打守勢波。射手卡卡奧啱啱獲重召入德國國家隊，係時候向國家隊揸Fit人勒夫「騷哥利」，要入波？冇問題啦！


大勝11:1前鋒開晒齋


史浩克呢邊，上季分心歐聯幾乎搞到出事，主帥蘭歷克今季定必打醒精神，唔想再有危機。佢哋喺季前熱身賽戰績唔算突出，但啱啱場德國盃就大勝坦寧根11:1。雖然坦寧根只係德國第7級聯賽嘅球隊，史浩克大勝冇乜參考價值，但始終射手亨特拉爾同魯爾等都開晒齋，前鋒有信心，士哥自然滾滾來啦。


史特加防線3將打柴


更重要係今仗雙方防線都穿窿，史特加有畢卡錫、尼達美亞同迪比亞抖緊，荷蘭兵保拿奴斯雖坐完波監復出，但佢速度慢都係漏洞。今夏佢哋放走埋德拉舒，補番嘅墨西哥新兵法蘭斯高洛迪古斯又冇默契，咪一樣信唔過。




史浩克就仲弊，佢哋放走隊長紐亞，防線肯定大走樣！話晒紐亞係上季德國足球先生，頂上嘅費文雖然喺熱身賽表現唔錯，但到真正受壓嗰陣又係另一回事。睇埋佢哋近5次聯賽交手，有4次都開入球大，有條好路怕咩跟？


史浩克開咧戰冇料到


‧已踢2場正式賽事得1勝1和。

‧近5季開咧戰得2勝2和1負。

史特加近7戰4勝

‧連熱身賽計7戰得4勝2和1負。

‧近7次主場鬥史浩克得4勝2和1負。