皇馬搶韁天津輸少當贏

猪拉多纳

06/08/2011
文： 亨格比利

成個夏天奔波勞碌飛足43,441公里，皇馬終於嚟到亞洲行最後一站─天津。「銀河艦隊」上仗對住FC廣州（恒大）都精銳盡出照炒對手，今午面對FC天津照計會「一視同仁」，大炒冇留手，一於捧1.35倍「讓客」。（now632台周六下午5:45直播）




皇馬周三晚對住半力出擊嘅中超「一哥」FC廣州，照樣無情講，當正對手係巴塞咁踢，全場搶韁下大炒對手7:1完場。今日輪到FC天津做箭靶，雖然天津教練阿里漢賽前話：「唔想慘敗亦唔會慘敗。」但對住皇馬，唔到你唔想o架！


天津教頭阿里漢拒絕死守


天津嘅「皇馬躉」今次夠晒踴躍，捱更抵夜都要接愛隊機，據講天津體育場嘅頂級包廂座位一星期內已經售罄，門票出現供不應求。莫講話Fans期待見到「銀河艦隊」，就連FC天津班球員都一樣，主帥阿里漢承諾會畀晒所有球員落場圓夢，仲強調唔會死守，就連中場吳偉安都話要踢得進取啲，咁先對得住買貴飛嘅球迷喎。




你肯攻，最開心嘅肯定係皇馬！「銀河艦隊」前晚已經喺天津體育場備戰，新兵荷西卡利祖對辦，射手賓施馬及中場迪馬利亞又弗到漏，撞正有前鋒于大寶因膝傷上陣成疑嘅FC天津，大炒冇走雞。