曼城想坐正？問過紅魔先！

猪拉多纳

07/08/2011
文： 樂比堅尼

意味英超新球季即將展開嘅社區盾，將於今晚喺倫敦溫布萊球場爆發，由曼徹斯特市雙雄曼聯同曼城爭奪冠軍。曼聯以往對待社區盾一向抱住懶懶閒心態，過去十次參賽，僅得上屆於法定時間贏波，但今次對住威脅愈來愈大嘅死敵曼城，樂比仔唔相信費格遜會放軟手腳，長他人志氣滅自己威風，曼聯讓平半，上盤捧得過。




（now 671周日晚9時30分直播）


趁機滅死對頭威風


社區盾由上季聯賽冠軍同足總盃冠軍交鋒，戲碼睇落好勁，但認受性一向唔高，踢到咁上下，班後備就換晒出嚟，競爭嘅激烈程度，其實同剛於香港舉行嘅巴克萊亞洲錦標賽差唔多。




本來以曼聯近年對待社區盾嘅態度同往績，樂比仔真係揀唔落手，不過曼聯今仗對手係曼城，情況就完全唔同，正如上季阿仙奴喺聯賽盃對住宿敵熱刺，都特別加多兩錢肉緊，即使係盃仔都好，作為多年嘅死對頭，真係無理由讓畀你，何況曼城不斷招兵買馬後，已威脅到曼聯嘅盟主地位，費爵爺仲唔乘機攞威咩！


曼城內訌打仗大忌


事實上，論實力同狀態，曼城仲未去到曼聯嘅級數，尤其係曼城內部情況混亂，人事關係複雜，士氣又唔好，係行軍打仗嘅大忌，作為精神領袖兼上季英超神射手嘅泰維斯，個心已一早唔喺曼城度，今仗亦未歸隊而巴洛迪利熱身賽嘅腦殘表現，除充分反映佢唔夠成熟，同其他隊友嘅合作亦有問題！




反觀曼聯今季雖有史高斯、雲達沙退役，奧沙及布朗離隊，但補充嘅迪基亞、艾舒利楊格及菲爾鍾斯，都畀人朝氣勃勃嘅感覺，曼聯喺熱身賽五戰全勝，足足入咗二十球，狀態弗成咁，相信今仗可再下一城，擊敗曼城攞番個頭彩！