慕遜加柏架細撼拜仁

猪拉多纳

07/08/2011
文： 蘇斯黑柴

德甲首輪壓軸戲班霸拜仁慕尼黑主場迎戰慕遜加柏，拜仁對冠軍志在必得，主場第一擊當然備受追捧，不過黑柴認為除咗衞冕嘅多蒙特之外，今仗雙方嘅防線實力堪稱目前德甲最強，呢場大細中位數定喺3.5球並唔合理，推介1.75倍入球細。 （有線61及201台周日晚11時30分直播）


「七人防線」守出彩虹


慕遜加柏係黑柴今季嘅「細盤銀行隊」，佢哋上季頭22輪聯賽有18場開出大盤，只得16分仲勁失56球，係當時德甲失球數字最高嘅球隊，睇怕難逃降班厄運，幸而會方喺今年二月作出明智決定，搵嚟瑞士人法夫爾取代方錫克執教，佢並未帶嚟大牌球星，卻為球隊注入紀律同一套嚴密嘅防守體系，只用兩場波嘅時間，就落實咗一條難以取代嘅「七人防線」，包括門將達史特根，四名後衞贊迪斯基、史蘭斯、丹迪同達姆斯，仲有兩名防守中場洛特維迪同紐斯泰達，呢七個球員喺去年三月初到目前為止，只要冇傷冇病就不容取代。




法夫爾嘅魔法取得重大收成，慕遜加柏嘅防線由德甲最差變成其中一支最強隊伍，上季最後12輪聯賽共搶得20分，最後仲喺護級附加賽力克波琴，奇迹護級成功。連同兩場附加賽，球隊喺季尾最後12場比賽只失7球，12場波竟然有11場開細，包括作客拜仁輸0:1，今晚再訪安聯球場，當然繼續踢守勢波。


洛賓列貝利狀態不足


拜仁今季豪花逾四千萬歐元擴軍，但大部分錢都花喺整頓防線，作風穩健嘅老帥軒歷基斯回歸，肯定唔會好似前主帥尹戈爾咁重攻輕守，喺季前熱身賽同德國盃所見，拜仁喺破密集防守方面仍有待改善，今仗雖有一雙魔翼洛賓同列貝利傷愈，但狀態未足，就算贏都好難大勝。