期待90後日本打吡

猪拉多纳

07/08/2011


拜仁對慕遜加柏上演「90後日本打吡」，大家都知拜仁簽咗十九歲中場宇佐美貴史，原來慕遜加柏亦跟隨呢股「東洋熱潮」羅致咗二十一歲快翼大津祐樹，兩位日本U22隊友交鋒，為今場賽事增添亞洲味道。




宇佐美貴史以借用身份由大阪飛腳加盟拜仁，登入豪門人氣急升，喺季前熱身賽已好受注目。由日職升班馬柏雷素爾來投嘅大津祐樹，只係効力慕遜加柏，自然被忽略，但反而係好事，起碼壓力冇咁大，佢喺上月初已為慕遜加柏上陣，喺熱身賽協助球隊五比二大勝鴨巴甸，表現備受教練法夫爾讚賞，已當正佢係球隊骨幹成員。




一般輿論認為大津祐樹雖然加盟弱隊，人氣亦較低，但上陣機會應該比宇佐美貴史多，畢竟慕遜加柏正選位置競爭冇拜仁咁激烈，大津祐樹隨時可以冷門姿態跑出，成為另一位香川真司。