緬恩斯明醒利華古遜

猪拉多纳

07/08/2011


至於頭場緬恩斯主場對利華古遜，緬恩斯啱啱喺歐霸盃外圍賽出局，力疲心傷好難回到氣，黑柴捧1.95倍利華古遜客Ｗ。




（有線61及64台周日晚9時30分直播）




緬恩斯上季排德甲第五名，成績比預期更理想，可惜陣中三大王牌舒賀爾尼、賀治比同基斯甸富治斯今夏他投，實力嚴重削弱，今季開咧後表現之差等同災難，較早前德國盃面對第五級別業餘球隊茨韋布呂肯，竟然要踢足百二分鐘至憑加時險勝對手，但實際演出比結果更差，若非球證未能察覺該隊加時階段於己方禁區犯手球，並誤判對手一個合法入球作詐胡，隨時已經首圈出局。


射輸12碼唔夠三日難回氣


不過，緬恩斯始終過得初一過唔到十五，喺歐霸盃第三圈外圍賽遇上羅馬尼亞弱旅加斯梅登，兩回合賽事都喺領先下被追和，結果次回合鬥到互射十二碼射輸飲恨出局，次回合踢完至今唔夠三日，好難及時回氣同收拾失望心情。




利華古遜喺德國盃更首圈出局，作客面對德乙球隊特雷斯登，喺三球領先下被逼和，最終加時輸埋三比四，不過該役新帥杜特犯上輕敵錯誤，喺三球領先下收起隊長路菲斯同主力連拿度奧古士圖。球隊出局後有足足八日時間準備今仗，相信會痛定思痛博翻身，佢哋近三次作客緬恩斯取得兩勝一和佳績，憑較佳質素、經驗同體力，有力追打緬恩斯呢隻落水狗。