波圖葡超盃執甘

猪拉多纳

07/08/2011
文： 巨高

今屆葡萄牙超級盃由波圖對甘馬雷斯，比賽於中立場阿威羅市政體育場舉行。波圖有幾勁唔使多講，上季一次過擸晒歐霸盃、葡超及葡盃。雖然少帥保亞斯已轉投車路士，但令人安慰係陣內大部分主力都留低，未有成為保亞斯「嫁妝」。而以波圖超班實力，今場葡超盃可謂囊中之物，「讓球主勝」揸得過。（有線155台周一凌晨4時直播）




前波圖教練保亞斯轉到車路士後，盛傳幾位主力球員包括法卡奧、侯克及摩天奴都話緊隨過檔。但現時三位球員仍留喺波圖，攻力得以保持。仲有，波圖已經使咗接近3億港元買人，當中包括巴甲山度士一對翼衞丹尼路達施華及阿歷士辛度，而丹尼路達施華將於二○一二年才報到。


甘馬雷斯上季大敗2:6


或者球迷會擔心波圖新教練域陀佩利拉上任後，會對球隊演出構成影響。不過巨高可以寫包單，呢個域陀佩利拉唔會作太大改變。查實佢就係上季保亞斯嘅「冧巴溫」助手，所有操練程序、排陣及戰術都係由佢同保亞斯合作統籌，相信佢會將上季成功概念，完完整整放落番波圖身上。




上季葡盃決賽甘馬雷斯與波圖鬥攻，結果波圖贏六比二，今次轉戰葡超盃，波圖再大炒對手唔出奇。