小保加讓唔起奧林普

猪拉多纳

07/08/2011
文： BlackJack

《過關Jackpot》第一次同大家見面，BlackJack早成個禮拜就做定功課，度咗條「阿巴三串一」，用奧林普下盤過山度士、巴希亞雙W，希望打響頭炮，幫各位波迷搵些少暑假使費。




BlackJack揀咗阿甲奧林普對小保加作重點推介，原因係小保加呢兩年實在令人失望，今季雖然又嚟大換血，但係季前表現麻麻，去歐洲踢3場波都未贏過，新兵施維坦歷治、艾菲迪兩件中前場又跛咗，由法甲回歸嘅龍門卡路士蘇沙兩日前至簽約，註冊手續做得太遲，今場波未必出得，簡直一塌糊塗。最頂癮係出發去奧林普之前，隊正選响為時75分鐘嘅練習賽，居然輸畀後備搭職員嘅烏合之眾1:4，唔知係留力定真係堅流嘞。


連續3場熱身賽不勝


奧林普上季排阿甲第4，演出幾令人刮目相看，佢哋今季都有大變動，踢走10個補番7個，不過奧林普個陣容其實冇乜點郁，11件正選有9個係舊人，實質只係補充新血提升活力，主場對住小保加有得受讓，下盤唔博點得？




另外嗰兩關揀晒巴甲嘅主隊，包括山度士同巴希亞，原因係佢哋嘅對手施亞拉同戈亞尼恩斯作客都唔識贏波，勝率得十幾個巴仙，自然係玩主W。