布倫瑞克洩氣法蘭克福唔怕捧

猪拉多纳

07/08/2011
文： 朱楓

好多球隊喺季初彈出都係靠道氣，喺德乙兩連勝嘅布倫瑞克日前就喺德國盃畀拜仁炒咗鋪，信心肯定受到動搖，今晚主場對住有射手芬連復出嘅法蘭克福，隨時再輸都唔奇，平手盤朱楓睇好法蘭克福坐走望贏！（開賽時間：周日晚7:30）


芬連復出如虎添翼


今季從丙組升上嚟嘅布倫瑞克一開咧係威係勢，連贏1860慕尼黑同亞琛，本來士氣爆燈，早幾日喺德國盃第1圈主場對拜仁，成班球員仲話有信心淘汰對手添，點知就食咗一記悶棍，大敗0:3，班球員都咪話唔氣餒。據報，布倫瑞克教練利百尼治地位已經受到動搖，打算今晚變陣出擊，好衰唔衰後防丹尼斯杜根又腓骨骨折缺陣喎，想重返勝軌絕對唔易！




況且，佢哋今場嘅對手係法蘭克福，呢支今季由德甲降班嘅球隊，由於成功保留大量骨幹，季初已被視為今季德乙升班大熱，結果佢哋開季表現亦對辦，取得1勝1和，啱啱喺德國盃亦輕鬆晉級，當中中場美亞暫時仲以3球排德乙射手榜冧巴溫，捷克國腳芬連亦喺上場聯賽對聖保利嘅最後半個鐘復出，加埋希臘射手基卡斯，今晚有權反轉布倫瑞克！