波圖新帥搶盃證實力

猪拉多纳

07/08/2011
文： 洪心Dee

歐洲各大聯賽陸續開咧，今晚就有場波圖對甘馬雷斯嘅葡萄牙超級盃畀大家熱吓身。今場係波圖新教頭域陀佩雷拉帶隊出戰嘅首場正式賽事，新官上任當然要做番場好戲，一於捧波圖「讓球主勝」！（有線155台周一凌晨4:00直播）


甘馬雷斯近6次對賽未贏過


波圖上季勇奪三冠，上任教練保亞斯立即畀車路士撬走，新主帥域陀佩雷拉接手後就話唔怕貨比貨：「我最鍾意喺壓力下工作，我一樣可以為波圖爭錦標。」




波圖前鋒法卡奧、侯克同中場摩天奴都係各歐洲豪門嘅斟介對象，其中侯克更盛傳會隨保亞斯過車仔，但係呢個巴西射手就發表效忠宣言，大派留隊定心丸，今場一於等睇佢表演。




至於甘馬雷斯近6次對波圖得1和5負，輸嗰5次都輸2球或以上，上屆葡盃決賽更大敗2:6，佢哋今季又冇乜特別收購，只得柏度文迪斯稍有名氣，咁嘅實力點同波圖爭盃呀？