歐洲Ball連珠炮：葡超Big3玩晒！

猪拉多纳

08/08/2011


新一季葡超即將舉行，相信今季又係由「Big3」控制大局。始終三支大隊喺人腳質素方面較為突出，其他球隊都幾難威脅三強地位。自從○○至○一年球季由博維斯塔贏得葡超後，對落十季都由波圖、賓菲加或士砵亭捧盃，而波圖更曾七度封王，弱勢球隊想話打破壟斷局面，睇怕又要靠中東財團出手打救。




波圖上季以壓倒性姿態奪冠，仲擸埋葡萄牙盃及歐霸盃，屬現時葡超實力最強球隊，今季必成擂台躉。即使少帥保亞斯已經轉教英超車路士，但對球隊影響唔會太大。


賓菲加季初發力


事關新帥域陀佩利拉上季係波圖副練，執教套路與保亞斯極為相似，加上佢以前又做過波圖青年軍教頭，熟悉球隊運作，料可繼續為波圖帶來成功。更重要係主力球員冇離隊，有兩大射手法卡奧及侯克助陣，球隊攻力有保證。




里斯本球隊賓菲加上季衰在季初脫腳，頭四戰輸三場，最終追唔到波圖無話可說。相信今季賓菲加一定會集中精神「開靚個頭」，以免畀波圖太早放甩。




賓菲加喺暑期以高價賣走法比奧干查奧，但球隊亦迅速進行補救措施，先從西甲羅致到卡迪維拿及加雷，再向熱拿亞借用葡萄牙首席門將伊度亞度。加上奧斯卡卡度素、艾馬及沙維奧拿等南美進攻好手，賓菲加陣容唔差得過波圖，有力爭標。


士砵亭新兵多考起新帥


至於士砵亭方面，暑期從布拉加聘請教練杜明高斯，希望靠佢旺氣帶領球隊走出困境。近年士砵亭表現都唔好，上季早就畀波圖及賓菲加拋離成條街，所以今季決定大事擴軍圖重振雄風，其中保加利亞前鋒保積洛夫、西維爾中場迪亞高卡普及巴塞新星謝法倫都投入士砵亭陣中。突然間有咁多新球員湧入，點樣籌組成一支有競爭力嘅團隊，就要考考杜明高斯嘅功力。

葡超16路大軍介紹

士砵亭

上季排名：超3

主力：保積洛夫

教練：杜明高斯

簡評：近年成績遠不及波圖及賓菲加，要重奪葡超冠軍需要大幅度進步。

布拉加

上季排名：超4

主力：維亞拿 教練：夏迪姆

簡評：葡超第四勢力，上屆歐霸盃亞軍。穩守突擊打法效率高，有力爭三甲。

費利拿

上季排名：超7

主力：亞蒙

教練：域陀利亞

簡評：小球隊揀外援特別有心得，愛爾蘭前鋒亞蒙是其中一個成功例子。

里奧艾維

上季排名：超8

主力：般奴捷拿 教練：卡路士比圖

簡評：全隊都來自巴西及葡萄牙，隊友間同聲同氣，默契將成搶分最大本錢。

奧漢倫斯

上季排名：超11

主力：戴地

教練：費基拉

簡評：近年表現相當平淡，今季仍然要為護級打拚，前景未敢太樂觀。

塞圖巴爾

上季排名：超12

主力：列卡度施華 教練：列比路

簡評：另一支降班熱門球隊，少帥列比路首次領軍，能力如何有待證明。

基維辛迪

上季排名：甲1

主力：安迪肯拿

教練：保羅艾維斯

簡評：上季葡甲冠軍，入球數字超過五十，攻力強勁於葡超應有一番作為。

費倫斯

上季排名：甲2

主力：賓希亞路教練：昆姆馬查奴

簡評：長期於低組別比賽，今季升上葡超唔易適應，宜採取觀望態度。

波圖

上季排名：超1

主力：法卡奧 教練：域陀佩利拉

簡評：教練保亞斯離隊由副練域陀佩利拉頂上，但對實力唔會有太大影響，仍屬奪標大熱。

賓菲加

上季排名：超2

主力：奧斯卡卡度素 教練：謝素斯

簡評：暑期引入西甲球員卡迪維拿及加雷，今季有力威脅波圖王者地位。

甘馬雷斯

上季排名：超5

主力：艾格般奴 教練：馬查度

簡評：近年葡超演出令人滿意，上季更打入葡盃決賽，若保持強勢有望爭歐洲賽席位。

國民隊

上季排名：超6

主力：托杜奴域 教練：伊禾韋拉

簡評：馬德拉島球隊主強客弱，國民隊亦不例外，今季仍會靠地利優勢搶分。

馬里迪莫

上季排名：超9

主力：馬昆奴教練：柏度馬田斯

簡評：與國民隊一樣來自馬德拉島，主場當然有威力，惟實力稍稍不及國民隊。

利亞拿

上季排名：超10

主力：馬高蘇亞雷斯教練：卡辛拿

簡評：球隊規模收納不少非洲好球員，今季將會以雄厚體力挑戰前十名。

比拉馬

上季排名：超13

主力：謝美丹尼爾教練：雷賓度

簡評：由伊朗商人比殊耶擁用，有中東財團背景，但未有對球隊投入太多資源。

科英布拉大學

上季排名：超14

主力：奧蘭度 教練：柏度艾文奴

簡評：前波圖球員柏度艾文奴曾與莫連奴捧過歐聯，今次首度執教葡超球隊。

投X錦囊

上季僅兩支球隊聯賽平均入球超過兩粒，分別係波圖及賓菲加。

除冠亞軍波圖及賓菲加之外，未有其他球隊聯賽勝出率達5成。

3支球隊上季聯賽開細率逾7成，包括馬里迪莫、里奧艾維及奧漢倫斯。