羅斯托克有排執難敵波琴

猪拉多纳

08/08/2011
文： 走肖

舊嘅唔去、新嘅唔嚟，羅斯托克今晚喺德乙主場對波琴，被稱為「細碼香川」嘅日本中場乾貴士有機會為波琴首次登場，加上中場新星馬簡艾甸開咧後大躍進，要搞掂陣容大變嘅羅斯托克唔難，平手捧波琴着數。（開賽時間：周二凌晨2:15）


前鋒文度或倦勤


兩隊最近喺德國盃碰頭踢成2:2，最後互射12碼羅斯托克輸3:5出局。睇番近況，羅斯托克開季未贏過，證明即使簽到紐倫堡嘅05年德甲神射手文度、不來梅中場柏夫爾同杜伊斯堡中場米高布林幾件好嘢，羅斯托克始終要時間夾熟至撻得着，文度今場仲可能因傷避戰添。




上季喺附加賽飲恨升唔到班嘅波琴，據聞有鄭大世扭計想去李斯特城罷操，表面睇要唔過，但其實鄭大世因為有傷今季未落過場，似乎唔會對波琴有咩短期影響。更何況，德國傳媒以「細碼香川」嚟形容同樣來自大阪櫻花嘅乾貴士，仲畀件11號波衫佢着，中場土炮新星馬簡艾甸喺近戰亦表現出色，獲德國傳媒大讚，有佢兩個孭飛隨時有驚喜。