洪禮賢講馬:先苦後甜又何妨

猪拉多纳

　　如果鍾意跑馬嘅朋友，唔好計輸贏呢個大前提，有馬跑嘅日子，肯定比暑假過得快好多好多。唔係因為洪某係業內人士，先至有咁嘅睇法。走去問吓踎喺投X處門口煲煙嘅阿伯，或者喺馬場內「大聲疾呼」嘅80、90後，有馬跑日子，令佢哋生活充實唔少。

唞暑培養新鮮感

　　不過，世事係矛盾，如果冇歇息期，又可能唔會令大家覺得馬季過得咁爽！個幾兩個月時間，令大家重新「洗腦」，再去接受（正如馬匹儲新鮮感一樣），就會有強烈需求。而呢種對賽事嘅需求，有冇足夠衝勁，可衝到去明年7月，人人唔同啊？！不過，由於現時馬季拉長咗，中間多咗break，偶然停一停，又會助燃那股需求繼續燒。

　　站於個人立場，6月尾收咧，或7月中，其實冇所謂，不過，如果因為煞科在6月份，令賽期要排到密一密，出現3、4日跑兩期，又或者開季幾個月都冇1期輪空，咁寧願拉長去！多十幾日之嘛，雖然可能會嫌長，過程之中，唔會畀人覺得滾水淥腳，不斷經歷排位，賽日，又排位，呢類填鴨式賽期，暑假短少少，咪當係先苦後甜囉。

洪禮賢