洪禮賢講馬:噓爆係騎師專利?

猪拉多纳

　　股市日日跌，用嚇破膽嚟形容，絕對冇誇張。起身一開電視，知悉市況出現恐慌性拋售，跌1000點，原來話嚟就嚟，唔使有咩預警。

　　所以話，世界上冇咩嘢係有保證，一個浪冚埋嚟，天然災難嘅海嘯，定係金融海嘯，都會造成生靈塗炭、哀鴻遍野、民不聊生、水深火熱。有時災害會以秒殺速度殺埋身，未嚟得切嗌痛，已經一命嗚呼。

　　喺馬場之內，災害由來，通常與大熱門倒灶有關，唔通韋達、柏寶、白德民等人，騎隻99倍大冷門，跑輸返嚟會畀人柴台咩？﹗畀得馬迷喺亮相圈噓爆，梗係之前場次，跑啲好熱嘅馬而輸到用放大鏡搵唔到。

　　講開又講，好少練馬師同日連輸幾匹熱門，會畀人柴台，向來孭鑊好似係騎師專利，啱唔啱？唔識去界定，不過，出得嚟騎，預咗畀人「啡」。

　　講開大熱門，根據上季嘅大熱門統計，其實百分比唔錯。歸納晒3個場地，喺700幾匹大熱門中，勝出率有32%，而上名率仲可以超逾6成，算係幾穩重嘞！

洪禮賢