「歐豬」陷困境獻細

猪拉多纳

10/08/2011


近期歐美債務危機，引發全球股市急瀉，阿King身邊股民朋友個個唉聲嘆氣，引起今次「股災」嘅導火線係歐洲央行拒買意大利同西班牙國債，令市場信心盡失。咁啱呢兩隻全球注目嘅「歐豬」今晚熱身賽交手，意大利主場對西班牙，兩國經濟陷困境，一片愁雲慘霧，球員剛抖完暑，狀態亦不足，捧入球細。（周四凌晨2時45分開賽）


意西拍跳無心戀戰


意、西經濟一塌糊塗，但國腳級球員仍然享有天價薪酬，令人懷疑呢個光景仲可以維持幾耐，相信呢班打工皇帝依家都人人自危，估計佢哋心情都唔會好得去邊，今次踢「太公波」，隨時得過且過。事實上，由於西甲及意甲較遲開鑼，球員仍未操起十足狀態，想踢進攻足球，亦有心無力。尤其係西班牙人腳不整，中場大腦沙維缺陣，大大削弱組織力，未必可發揮出地上最強威力，切勿高估西班牙火力。




另一個債務危機國家美國主場對墨西哥，今場係美國新領隊奇連士文首仗帶隊比賽，應會全力爭取打響頭炮，而且墨西哥缺少查維亞靴南迪斯，實力受損，捧主勝。另外，哥斯達黎加主場對厄瓜多爾，兩隊近況都差，水鬥水博入球細。