國足Ｗ實食冇黐牙

猪拉多纳

10/08/2011
文： 蘇豪

中國熱身賽相約牙買加合肥拍跳，國足主帥高洪波極有可能於今仗結束後告別大軍，今次對手牙買加多位主力未有來華，陣容天殘地缺，誠意欠奉，預計國足可順利贏波，捧1.95倍主勝！




（周三晚7時35分開賽）




中國足總計劃換帥，前西班牙教頭甘馬曹勢將取代高洪波領軍，消息指今場將屬主帥最後一次帶隊出賽，相信一眾將士都會識做搏命爭勝，以勝利送別。國足射手郜林今場受傷缺陣，楊旭將於前線攻堅，此子早前對老撾表現突出，今次有力再擔大旗，國足攻力依然保持。




另外，內地有傳媒指國足於合肥集訓入住酒店房價要一千蚊一晚，各界即時狂插國家隊大使，國家隊方面馬上作出回應，指一千蚊價錢只屬酒店對外標價，國足實際入住價錢每晚只需三百，希望傳媒唔好搞搞震製造負面新聞，以免影響軍心。


牙買加唔齊腳當遊埠


另一邊廂牙買加面對兵源不足問題，隊中多位主力疑似詐傷拒絕隨隊出征，據報隨時得番十五個人調動，加上王牌前鋒富拿留在史篤城備戰聯賽，牙買加勉強拉雜成軍，戰鬥力實在有限，球員分分鐘抱住遊埠心態來華，戰意甚曳，唔好睇得太高。




國足近期戰績理想，先後於熱身賽戰勝洪都拉斯、烏茲別克及北韓等球隊，早前再於世盃外兩度大炒老撾，現時士氣甚佳，今次乘勝追擊，可望再下一城。