撐南韓「客勝」本利歸還

猪拉多纳

10/08/2011
文： 吉拿甸奴

亞洲重量級熱身賽今晚喺北海道札幌爆發，日本有鐵衞松田直樹突然離世，當正呢場係佢紀念賽，戰意唔需要懷疑，不過唔計互射12碼，南韓自05年起對賽未輸過，而且韓國假波成為國際球壇笑話，教頭趙廣來賽前發表「必勝宣言」，冇理由唔搏命，1.8倍「讓球客勝」抵捧。（開賽時間：周三晚6:30）




過去74次碰頭，90分鐘計算日本得12勝22和40負，自05年起未贏過，而且重奪亞洲盃冠軍後，日本喺主場對陣容不整嘅秘魯同捷克，都只能夠先後踢成0:0，證明球員唔多適應教頭沙哲朗尼嘅343新陣式，講到底，傳統上日本踢慣442，尋晚佢又下令改踢451陣式，再試新嘢，隊波又要重新適應，進攻難免冇咁放膽。


趙廣來發表必勝宣言


陣容方面，兩隊今場都係強陣出擊，日本徵召14個外流兵，南韓則有6個，日本主要有國際米蘭左閘長友佑都因傷避戰，南韓就有保頓翼鋒李青龍重傷、孫興敏發燒、池東源又因新特蘭拒絕放人缺陣，雖然消息話，呢場波賽前會為松田直樹默哀，球員都臂纏黑紗比賽，香川真司更講明會為前輩而戰，但唔好忘記，南韓球壇被假波事件重創，唔通佢哋又會想輸咩？




首先，南韓教頭趙廣來原本想選嘅濟州聯後衞洪正好同FC大邱後衞李尚德捲入假波案，激到佢黑晒面，點知前日佢哋去操練因為交通問題遲到，嗌職員開燈又被拒絕，而且練習場地白幡山競技場韓語發音接近「白旗山」競技場，搞到趙廣來覺得被玩嬲到出晒煙，所以發表「必勝宣言」決心砌低日本，受讓博得過。