賓菲加搵新丁祭旗

猪拉多纳

12/08/2011
文： 樂比堅尼

香港時間周六凌晨輪到葡超開鑼，升班馬基維辛迪主場對賓菲加。賓菲加上季不但屈居亞軍，而且輸到連波圖嘅車尾燈都見唔到，今季趁波圖少帥保亞斯離隊，仲唔加多幾錢肉緊，力圖東山再起咩？如果未能打響頭炮，點向江東父老交代先？樂比仔呢場撐佢哋「讓球客勝」！(周六凌晨3時45分開賽)


大事擴軍挑戰波圖


葡萄牙傳統Big3波圖、賓菲加及士砵亭一向極惡，近年加埋布拉加，可以話4強鼎立，樂比仔從來唔會亂咁捧呢幾隊嘅對家，因為呢4隊同其他球隊實力確實有一段距離，淨係睇波圖上季可以全季不敗兼以9成勝率捧盃，除咗證明呢隊波真係勁之外，亦睇到呢個聯賽水準有幾咁強弱懸殊。




賓菲加上季落後波圖成21分，真係乜嘢Face都冇晒。今季痛定思痛，當中包括羅致咗西班牙世界盃冠軍成員卡迪維拿、阿根廷國腳加雷、葡萄牙鋼門伊度亞度同比利時中場韋素，全部都係國腳級人馬，而且前、中、後位置都有所增強，加埋原本嘅奧斯卡卡度素、沙維奧拿同艾馬等主力，絕對有能力挑戰波圖嘅盟主地位，早前熱身賽擊敗阿仙奴、巴黎聖日耳門等勁旅，已證明佢哋準備充足，有喺新球季再起風雲嘅決心。


基維辛迪勢孤力弱


闊別頂級聯賽5年嘅基維辛迪，今季以葡甲冠軍資格升班，呢隊波喺05至06年度球季，因派違規球員上陣被罰，但佢哋因不服判決將事件告上民事法庭，結果觸怒國際足協，被重罰降班，更差啲連賓菲加在內嘅所有葡萄牙球隊都冇得踢歐洲賽，簡單啲講，呢隊波喺球場上冇朋友，今場對住賓菲加，唔使旨意人哋留手，捧「讓球客勝」係正路選擇。