維拉OK架！

猪拉多纳

12/08/2011
文： 麥馬拿仁

前維拉射手約基，認為舊會今夏賣走艾舒利楊格同達寧，只購入尼索比亞及基雲以作替補，本季只能等死，未必能打入英超前十。以牌面論，維拉的確弱了：但走了「反骨仔」士氣不跌反升，咁快批死維拉，季尾盞攞架嚟丟。




主力轉投大球會，乃中型班千古不變宿命。楊格上季已心不在焉，強留亦無謂；達寧已廿七歲，遇好價當然要放。球員無心効力，就唔該過主；呢個世界，冇話冇咗邊個唔得。落場行軍殺敵，十一個團結的臭皮匠，戰力唔會差過十一個無心戀戰的諸葛亮。




950萬鎊收購尼索比亞，肯定係個Good Deal。佢比達寧年輕兩歲，出波能力或者稍遜，但打法更具侵略性。另外，翼鋒馬克艾拜頓已夠料準備上位，而蘇格蘭矮仔班倫亦潛質優厚。早前維拉來港獻技，拿仁親身睇過球隊練波，班倫好波又有鬥心，操練時間夠晒，仍與占士哥連斯留下苦練控球。維拉班底唔曳，要殺入前十毫無難度，如麥利殊能有神來之筆，最終成功衝擊前六，亦不令人意外。