洪禮賢講馬：安國倫身手好

猪拉多纳

　　悉尼及新南威爾斯冠軍見習騎師安國倫，年青身手好，喺客串期如果唔係跑跑吓墮馬傷咗，斷唔會只得十幾場頭馬咁少，亦可能傷愈後未完全回復十足狀態，出番嚟騎之後，未完全見番晒佢嘅功架，同時，復出後普遍係冷門坐騎跑得好啲。

　　記得喺安國倫季初騎得三幾期，曾經寫過吓佢，當時經已覺得佢有啲嘢，基本功紮實不在話下，跑谷草亦冇話「恰眼瞓」，上山落坡有晒節奏，「外遊」唔多見。唔好以為呢啲係跑谷草基本要求，莫講話初來埗到嘅安國倫，有好多騎咗好多年嘅騎師，喺谷草出賽，坐騎排外檔幾乎係判咗極刑，總之，是是但但跑，好彩就走二三叠，但通常「外遊」了事。

谷草成績較突出

　　事實上，撇開安國倫喺谷草、田草及泥地坐騎實力係點？單論成績的話，的確係以谷草較突出，累積10冠5亞9季10殿（66負），跑入前四名達34%，分別比田泥、草地高出8及13個百分點。

　　值得一提，雖然安國倫唔係特別惹飛嘅騎師，坐騎成熱門次數唔算好少，而捧成大熱門則有8駒，但暫時1W都未有（4駒入三甲）。當然上季未有，唔代表今季唔會爆攤，以佢咁好身手，騎足一季都贏唔到隻大熱門，唔會啩？！

馬會賽馬節目主持　洪禮賢