紅軍煥然一新 「讓主」放心捧

猪拉多纳

13/08/2011
文： 阿占

繼上個禮拜德甲開鑼後，今周輪到英超返嚟有線喇！今晚開鑼日最大焦點就係夏天大手入貨嘅利物浦，「紅軍」上季中喺杜格利殊執教下愈踢愈好，經過一輪大執位後，相信會更貫徹杜帥嘅足球理念。小弟就睇好佢哋可以重返Big4行列。打頭陣主場迎戰新特蘭贏面好高，2.2倍「讓主」可以放心捧場。（有線200及300、廣東體育周六晚10:00直播）




利物浦上季初成績慘不忍睹，但自從杜格利殊上任已重返正軌。暑假期間一口氣買入查理阿當、佐敦軒達臣同達寧3個中場，仲有後備門將杜尼後，成隊波活力大大增強。尤其係中場線已經唔使再靠謝拉特單天保至尊，由於「神奇隊長」依家仲養緊傷，一班新兵更會擔起大旗。


「蘇卡配」擦出火花


不過我最期待嘅，反而係年初加盟嘅雙箭頭蘇亞雷斯同安祖卡路爾。烏拉圭射手蘇亞雷斯個人技術一流，打咗半季已經成為「紅軍」新英雄，新一季肯定有更佳表現。至於安祖卡路爾加盟後，大部分時間養傷，但小弟睇佢季前熱身表現相當唔錯，相信呢對一高一快組合會有好好嘅化學作用。


新特蘭奧沙唔踢得


至於有上季重心佐敦軒達臣今晚倒戈嘅新特蘭，季前就簽咗一大班二線兵，南韓前鋒池東沅、英格蘭新星域咸同曼聯兩大老將奧沙同布朗，整體實力反而冇咩大變。熱身賽3勝2和2負亦係普普通通，最弊係兩名主力奧沙、卡達莫因傷會缺席今場開鑼戰，作客晏菲路睇怕冇乜機會搶分咯！




新球季，小弟會繼續陪各位讀者睇好波。今季我哋有線重新增設24小時高清200（標清300台）頻道，全天候黐住大家一齊睇英超，記得唔好撳錯台號喇！


紅軍熱身賽失波多


‧今季6場熱身賽，平均失成2.5球。

‧近5場主場賽事贏咗4場。

黑貓作客晏菲路不勝

‧近6次交手輸咗4場。

‧連續6次作客利物浦未贏過，錄得4負2和。

頂占筍盤

利物浦 Vs 新特蘭

讓球主勝