凱沙羅頓揭奧格斯堡底牌

猪拉多纳

14/08/2011
文： 蘇斯黑柴

德甲頭場凱沙羅頓主場鬥奧格斯堡，奧格斯堡係黑柴心目中嘅降班膽，上仗主場面對實力跌Watt嘅弗賴堡唔輸已經夠運，今晚作客對住「德甲紅魔」凱沙羅頓冇運行，黑柴撐1.78倍凱沙羅頓主勝。（有線61台周日晚9時30分直播）




奧格斯堡今季首次亮相德甲，全無經驗亦財力有限，季前仲損兵折將，陣中最具級數射手杜爾克同教練盧赫基不和被內部禁賽，上季兩名主力射手拉菲爾同奧爾夏都因傷長抖，只能喺其他德乙球隊網羅球員補充實力。


高大中堅頂得住摩達斯


奧格斯堡上仗首度出師主場對弗賴堡，全靠新加盟嘅「大舊佬」摩達斯頂入兩球，以2比2逼和對手，但形勢下風，末段仲幾乎輸埋，球員技術粗糙亦欠缺組織，只靠高Q大棍同死球空襲，喺德甲唔夠踢。今仗對手凱沙羅頓擁有高大嘅雙中堅洛尼同馬特亞斯艾保，頂得往摩達斯有餘。




凱沙羅頓上季季尾表現一直進步，最後9場聯賽贏咗7場，今季首戰作客雲達不來梅輸0比2，有多次致命埋門甚至中柱鏡頭，計實力值德甲中游，今仗主場出擊遇降班膽，係時候打開勝利之門。