Football is not everything, is the only thing

猪拉多纳

14/08/2011
文： 黃興桂

歐美經濟及政治局勢動盪，不過，好多嘢愁嚟都冇用，呢個時候體育運動不可缺少，尤其英超足球，好多面對困境嘅朋友可以睇波作樂，暫時忘記一切煩惱，所以鑼照開、波照踢，因為足球係回魂丹、靈芝草！亂世當前，Peter認為「Football is not everything, is the only thing」，足球唔係好需要，係必須要！




由於環球經濟環境惡劣，依家好多球隊都唔會愚昧地亂作收購，除非有東歐暴發戶或中東酋長撐腰，否則好難大灑金錢買人。唔少英超中下游球隊暫時都未有石破天驚收購行動，最多都係以低廉價錢引入名氣較細嘅球員，喺轉會窗關閉前，Peter相信呢個情況唔會出現好大變化。


曼聯車路士精明買家


英超班霸曼聯希望簽下史奈達，但對方獅子開大口，費爵爺即時話唔買，但兵不厭詐，距離轉會窗關閉仲有十幾日，唔好畀老費呃倒，曼聯隨時仲有一個重磅收購。曼聯同車路士互相𥄫實對方，一老一嫩教頭都有足球智慧，所以先拎到咁多冠軍，兩人亦有Common sense，唔會喺亂世立亂入貨。


曼城亂買被當水魚


英明領隊絕對唔會好似曼城立亂收購球員，曼城一隊成員分分鐘超過三十人，當中有一打球員轉會費超過千萬鎊，但其實幾百萬鎊都唔值，之前買入占士米拿及布歷治等人根本唔值咁貴，擺明畀人當水魚。




新季開鑼有球迷問Peter睇好邊隊捧盃，又或者邊隊降班，不過，空口講白話非筆者所為，依家妄下判斷有點兒言之過早，若果鹵莽地預測，並唔係向讀者交代嘅行為。




嚟緊Peter會繼續留意各隊有乜舉動，同時觀察佢哋頭幾場賽事，去到九月左右先至會作出預測。

金句

英超鑼照開、波照踢，皆因足球係惡劣環境靈芝草！