噴火艦隊轟巴塞

猪拉多纳

14/08/2011
文： 力奇

全球矚目嘅西班牙國家打吡又嚟嘞！西班牙超級盃今晚上演首回合，由皇馬主場迎戰巴塞。季前賽操到火噴噴嘅銀河艦隊，球員個個上晒力，C朗、賓施馬等腳風大順，反觀巴塞熱身賽表現麻麻，今仗仲受到傷兵困擾，多名主力唔出得，美斯首演又隨時冇貨交。皇馬讓平半，我捧2.04倍上盤！（now632及660台周一凌晨4:00直播）




皇馬近季畀巴塞食住，球隊上下一心求反彈，淨係睇佢哋季前熱身賽7戰全勝，喪入27球僅失5球，就知佢哋決心有幾大。銀河艦隊今夏買入嘅新兵雖然唔係超級大牌，但包括法比奧干查奧同荷西卡利祖都係實用之輩。至於前線一對孖寶C朗同賓施馬都弗到漏油，喺主場有能力先贏一仗。




巴塞呢邊，教練哥迪奧拿季前熱身賽真係唔多着緊，包括美斯同馬斯真蘭奴等南美兵，全部唔使踢啱啱先歸隊。佢哋喺熱身賽輸過畀瓜達拉哈拉同曼聯，對弱旅贏波又唔算清脆，球員狀態根本唔足以打硬仗。


美斯唔弗碧基有傷


最慘係巴塞近日再傳壞消息，主力布斯基斯同碧基都話喺上周中國際賽受傷，加上隊長佩奧爾、沙維仲未傷愈，就算碧基紮住踢，都仲要將馬斯真蘭奴移後。陣容不整，美斯同新兵阿歷斯山齊士又未踢過正式熱身賽提升狀態，今仗出訪巴拿貝輸少當贏啦！