拿尼弗到爆新兵對辦 曼聯布捷

猪拉多纳

14/08/2011
文： 朱楓

「擂台躉」曼聯今晚將進行衞冕英超第一擊作客西布朗，朱楓相信「紅魔」甩拖機會極細！事關曼聯今季大換血後效果對辦，拿尼仲要弗到漏，喺呢場今季初最易打嘅賽事，試問點會放過一向恰慣嘅西布朗？1.46倍客W值得熱捧！（有線200及300、廣東體育周日晚11:00直播）


季初惡戰連場唔衰得


上季超越利物浦第19次捧走英格蘭頂級聯賽冠軍嘅曼聯，今季為實現20冠夢想進行大換血，高價簽入迪基亞、菲爾鍾斯同艾舒利楊格，結果3位喺季前熱身賽表現都對辦，但講到勁始終唔及拿尼，上周末喺社區盾梅開二度，帶領曼聯戲劇性反勝同巿宿敵曼城3:2捧盃，極有師兄基斯坦奴朗拿度影子。




雖然曼聯上季成功捧盃，但其實頭8場只攞到14分，可能都知唔係季季咁好彩，隊長尼曼查維迪日前就話希望全隊上下今季盡快上力。事實上，曼聯季初惡戰連場，頭10Round已要對齊上季排第2至7球隊，預計今場只得左閘艾拉上陣成疑，肯定唔會放過西布朗。


西布朗奧丹維治被撬


至於上季中改由鶴臣接手後、表現穩定咗好多嘅西布朗，今季簽得伯明翰門將賓科士打同雷丁前鋒沙恩朗等多位實力派球員，本來都畀到朱楓一定憧憬，點知近日同王牌前鋒奧丹維治傾續約時出現阻滯，畀韋根乘機挖角，話冇影響軍心就呃你；而且嗰班紅魔射手又睇通晒倒戈門將賓科士打嘅弱點，肯定當佢係靶咁射，加上西布朗近7次主場對曼聯都輸波，今場想破宿命絕對咁易！