史雲斯翻轉曼城

猪拉多纳

15/08/2011
文： 樂比堅尼

　　香港時間周二凌晨英超獨腳戲，曼城主場對史雲斯，一隊係今季花咗超過5000萬鎊嘅富豪球會，另一隊係身價最高球員僅值350萬鎊嘅升班馬，級數差天共地，但有錢唔係大晒，曼城外憂內患情況嚴重，來自威爾斯嘅「白天鵝」史雲斯絕對有能力偷雞，冷敲「讓球客勝」。（有線300及200台周二凌晨3時直播）




早喺上周社區盾，樂比仔已非常看淡曼城今季前景，但估唔到佢哋可以喺領先兩球情況下畀曼聯連入三球，雖然呢場賽事屬表演性質，唔能夠武斷咁話曼城今季一定唔掂，不過佢哋喺比賽中浮現出嚟嘅問題，絕非一朝一夕可解決。




首先，曼城最缺乏就係核心人物，除實力要出眾外，佢亦要充當球隊精神領袖，本來泰維斯最有條件擔當此角色，可惜佢同文仙尼已貌合神離，佢同球隊另一名新加盟核心阿古路今仗亦未知能否上陣，一隊波冇重心球員，係好難建立隊形同士氣，唔好忘記呢隊波特別多麻煩友！


曼城冇隊形忌熱捧


第二係球隊欠缺風格，主力陣容搖擺不定，呢方面同領隊文仙尼功力有關，文仙尼非感染力強領隊，球員比賽期間容易精神唔集中，上季多次失利於弱隊腳下絕非偶然。




英超今季三支升班馬，排名最低係史雲斯，但樂比仔最睇好就係佢哋，原因好簡單，要喺英冠封王講求嘅係進攻力，但升上英超情況完全唔同，防守叻先有能力立足，喺呢方面，上季有廿一場聯賽保持清白之身嘅史雲斯，就最有條件喺英超發圍！其擅長嘅穩守突擊戰術，今場話唔定可大派用場！


曼城英超首輪主場成績


年份 戰果

05年 0:0西布朗

04年 1:1富　　咸

95年 1:1熱　　刺

93年 1:1列斯聯

92年 1:1昆士柏流浪