里昂金漆招牌碌爆卡

猪拉多纳

16/08/2011
文： Wendy

車仔攻極都攻唔入史篤城，心諗呢個星期英超唔係開晒下盤咁邪？之後仲要又見到迪基亞甩拖失波，嚇到我呢個曼迷心都涼咁截。好在最尾西布朗好客氣送球烏龍畀紅魔鬼，等我可以保持好心情迎接今晚歐聯外圍賽，心水係主場出戰嘅法國里昂，話晒佢哋連續十年踢入歐聯分組賽，冇理由今季先至斷纜啩？（有線62及202台周三凌晨２時45分直播）




里昂今月聯賽對手都係弱旅居多，令佢哋可以專心迎戰魯賓卡山，雖然啱啱累街坊打和阿些斯奧，但其實佢哋佔盡優勢，射極唔入只係冇運，今晚之戰係新教練加迪考牌作，肯定搏老命爭勝。


魯賓卡山鋒力曳


魯賓卡山今季表現失色，季初甩晒拖，依家喺俄超追極都只係第四位，佢哋最大問題係鋒力，兩位首席射手卡拉丹尼斯同諾保亞都係中場球員，雖然喺西班牙靴高斯搵到巴拉圭國腳希度華迪斯返嚟，但遠水不能救近火，以魯賓卡山近年喺歐聯分組賽嘅作客表現，今晚好牙煙咯！