洪禮賢講馬：信念終站是滿足

猪拉多纳

　　唔識轉膊唔緊要，山不轉路轉，自己想唔轉又點，撞山嗎？又唔係魔術師，冇本事穿牆，死死氣咪另覓出路。

　　執着與堅持，其實差唔多，美化字眼之嘛！正如究竟係寂寞慘啲，定係孤獨難頂？總之都係冇人陪，分嚟有乜謂呢？！

　　而對事物抱住一份信念，個人唔認為一定喺執着或堅持是但一邊，層次可能更高。執着，有時係睇唔清成盤棋係點，盲樁樁撞埋去；堅持，應該會係己見囉，或是自我放大嘅second line。

　　信念，唔排除係執着加堅持，再乘以預想！但去到最後亦有機會化為炮灰。不過，凡事冇信念，同條咸魚冇分別。

　　喺賽馬世界，對某啲馬有信念好重要，層次或意識上，唔等同追馬買。事關追馬買，或者係唔忿氣，先至作出唔理性行為；但對1匹馬有信念墊底，情況會唔同，有願景嘛，或可達成，終站便是滿足！試想想，上季初如對「勁高手」跑了頭幾仗後仍有信念，往後而來嘅滿足感有幾大！

馬會賽馬節目主持　洪禮賢