米禾爾彼德堡做大龍鳳

猪拉多纳

17/08/2011
文： 麥馬拿仁

英冠快車繼續全速開行，四場聯賽以米禾爾主場鬥彼德堡最有心水，捧大！米禾爾季初雖放走史提芬摩利臣，但新射手達路斯軒達臣着晒火，兩場聯賽入兩球，攻力犀飛利；彼德堡升班後繼續有前冇後打死罷就，開咧三戰全開大，咁好路冇理由唔追！




（周四凌晨2時45分開賽）




彼德堡一日用戴倫費格遜做領隊，一日都係「大盤客」心頭好。呢名費格遜愛兒崇尚進攻，但顧得攻嚟就永遠執唔掂後防，攻強守弱下周時同對手大手交易，開咧首仗落後一粒後反勝水晶宮，上仗作客黑池就被對手反勝，睇到呢班波係「神經刀」。彼德堡進取風格既定，唔追就笨。


米軍新箭頭有料到


米禾爾上季靠箭頭史提芬摩利臣食胡，今夏佢離隊後球隊收購錫菲聯鋒將達路斯軒達臣代替，○八年佢身價仍高達二百萬鎊，今季加盟後迅即入局，再加上約翰馬基斯、保亞沙、托達等，今次分分鐘同彼德堡癲鳳鬥狂龍。




另外卡迪夫城主場鬥白禮頓，雙方狀態托弗難分勝負，入波應一球起兩球止，捧細；黑池老將菲臘斯踢快車賽程未必有貨賣，主場鬥打比郡亦取細。