洛賓復出拍列貝利 拜仁雙翼蘇quali

猪拉多纳

17/08/2011
文： 朱楓

啱啱喺德甲開齋嘅拜仁慕尼黑，今晚會踏上歐聯征途，喺附加賽首回合主場對蘇黎世。雖則話拜仁近況麻麻，但係預計洛賓會復出，有權大勝鬧中場荒嘅蘇黎世，1.42倍「讓球主勝」熱得有理！（有線61、201及中央5台周四凌晨2:45直播）




雖然今夏大事擴軍，但拜仁慕尼黑嘅新季表現只係麻麻，上仗作客禾夫斯堡，最後僅靠中場路爾斯古斯達禾喺補時階段建功，先符碌贏1:0，只不過成功喺德甲開齋，的確增強咗球員信心同士氣，有助今晚發揮。


唔怕軍情外洩信心爆棚


其實拜仁近排踢得咁曳，跟洛賓同列貝利成日傷有好大關係，兩人今季開咧後原來未試過一齊擔正，不過教練軒歷基斯賽前爆料，話上場因背傷缺陣嘅洛賓已經復操，有信心可以喺今仗披甲。梗係啦，賽前有德國傳媒估計，拜仁入唔到分組賽就攞唔到至少2,000萬歐元（約2.2億港元）收入，唔博就假。賽前前鋒馬里奧高美斯仲特別同前史特加隊友、目前効力蘇黎世嘅左閘麥連互傳訊息探聽對方軍情，完全唔驚畀人摸清啲路，反映拜仁信心爆棚。


蘇黎世鬧中場荒


蘇黎世近年進步神速，09年仲歷史性殺入分組賽，作客仲贏過AC米蘭。今季佢哋以瑞士超級聯賽亞軍身份打歐聯，上圈兩回合計淘汰比利時勁旅標準列治2:1晉級，日前仲喺瑞士超反勝死敵巴素利，但代價就認真大，中場大將古古魯索域右膝十字韌帶撕裂，證實要抖半年，加埋一早受傷嘅沙維亞馬基斯同蘇烏希，本來5個中場中路球員依家只得番2件可以用，再加上正選右閘菲臘比高治又要停賽，作客拜仁輸兩粒係最低消費！