黑池新兵超班好打得

猪拉多纳

17/08/2011
文： 安高

喺英冠開咧同樣2戰全勝嘅黑池同打比郡今晚狹路相逢，安高就比較睇好黑池可以喺主場再捷，事關佢哋陣中有2大巨星菲臘斯同巴利費格遜，卡士超班，加埋主場之利，要開瓣1.7倍主勝應易如反掌。（開賽時間：周四凌晨3:00）


打比郡輸默契往績


雖然走咗隊長查理阿當，但爛船都有三斤釘，黑池今季由英超降落英冠，保留咗部分英超主力，整體實力要爭升班都仲有可能。最緊要係今夏增兵揀啱路，搵嚟前蘇格蘭國腳中場發電機巴利費格遜，前線就搵嚟38歲嘅長青樹菲臘斯，其中後者上周日對住彼德堡贏2:1之役就梅開二度，有佢喺前線孭飛入波，就算後場有伊斯譚停賽都冇有怕。




打比郡今季開咧都算順風順水，喺主帥尼祖哥洛夫帶領下2戰全勝。不過，「綿羊」今夏引入咗超過10名新兵，默契配合需時，係咪場場交到貨真係難講。最慘係中場占士貝利養傷，近年4鬥黑池又只得1勝1和2負，輸埋心理，今晚作客真係捧唔過o架！