熱刺餓狼出柙赫斯醫肚

猪拉多纳

18/08/2011
文： 力奇

英超熱刺今晚嚟到歐霸盃附加賽首回合作客蘇格蘭赫斯，當然唔想有任何閃失。佢哋上周英超開咧戰因暴亂取消，成班餓狼出柙搵食，唔難大炒換帥冇耐嘅赫斯，我捧2.3倍「讓客」！（開賽時間：周五凌晨2:45）




聯賽開咧對愛華頓之戰臨時取消，無疑影響咗熱刺嘅部署，但話佢哋狀態唔足，力奇就絕對唔認同。事實上，熱刺之前熱身賽就取得3連勝，上仗對住西甲實力分子畢爾包都贏到2:1，唔通會驚實力差一皮嘅蘇超二線球隊赫斯咩？


派助教刺探軍情


再者，為咗提升贏波機會，熱刺主帥夏利列納日前專登派出助教基夫阿倫去赫斯主場贏鴨巴甸3:0嘅聯賽吼路，務求做到知己知彼，對手攻守有乜弱點，自然一清二楚。




至於話佢哋今仗有多達6名主力，包括加拿斯、京治、派拿、贊拿斯、侯度史東同辛度雲尼亞里都唔踢得，賓尼同杜斯山度士又話唔喺大軍名單，不過力奇睇過佢哋預計嘅出場陣容，咪一樣係齊晒腳。防線有戴臣同卡保奧鎮守，中場有加里夫巴利同艾朗連儂雙翼齊飛，前線仲有雲達華治去支援迪科爾，攻守都有重心頂住，絕對夠殺有餘啦！


赫斯易帥立立亂


赫斯呢邊，開咧踢咗3場波就炒咗領隊謝菲利斯，換嚟前葡萄牙球星保羅沙治奧領軍，雖則話後者上任3戰取得2勝1負成績，但查實睇佢上季帶領士砵亭，戰績都係麻麻，唔算係個有料領隊。賽前仲有消息傳出，佢哋會由踢慣嘅「442」陣式轉做「451」，即係話打守勢波，久守必失有危機o架！仲有，今仗復任正選嘅中堅韋斯達，今季只係踢過大約10分鐘比賽，狀態未足，點樣守得住迪科爾吖？