慕遜加柏強細延續

猪拉多纳

19/08/2011
文： 蘇斯黑柴

周六凌晨德甲獨腳戲慕遜加柏主場對禾夫斯堡，黑柴季前已講明慕遜加柏係今季「細盤銀行隊」，結果開咧至今連中兩鋪，相信佢哋未來十場仲有最少七至八場會開細盤，今晚入球細有2倍值得追。




（有線61台周六凌晨2時30分直播）




慕遜加柏自今年二月由瑞士教頭法夫爾接手後，踢法作出一百八十度轉變，成為防守專家，連上季尾附加賽，近14場聯賽竟然有13場開出細盤，但莊家開盤仍然睇番成季數據，所以細盤依然有得分。


門將達史特根有料到


慕遜加柏喺法夫爾調教下，防線嚴密之餘仲充滿層次感，迫使對手只能喺外圍遠射，但年輕門將達史特根又身手不凡，想入佢哋波真係好難，今仗雖有兩名中堅史蘭斯（養傷）同保華斯（停賽）缺陣，但司職左閘嘅隊長達姆斯可以勝任中堅位置，將左閘讓畀今季由哥本哈根來投嘅瑞典國腳雲特一顯身手，防線體系基本上變動不大。




慕遜加柏防守穩，但攻力差，今季只入過兩球，其中一球係十二碼，而對拜仁建功者迪甘馬高今仗又因傷缺陣，即使主場亦難有主攻本錢。禾夫斯堡今季引入德國國腳防守中場德拉舒，令防線增添一道有力屏障，至今兩戰只失一球，但攻擊線沙歷咸美斯、希美斯同文迪蘇傑級數亦唔高，相信作客都唔敢強攻，入球唔會多。