狼堡平手客爆慕遜加柏

猪拉多纳

19/08/2011
文： 朱楓

德甲今晚上演獨腳戲，由慕遜加柏主場對禾夫斯堡。雖然「狼堡」上輪輸波，但表現仲好過拜仁，而且今場有救兵希斯佩加首度亮相，力足擊敗受傷停困擾嘅慕遜，平手盤朱楓捧「狼堡」！（有線61及201周六凌晨2:30直播）




上季護級成功嘅慕遜，今季睇落有反彈迹象，暫獲1勝1和，但查實每場僅入1球，鋒力麻麻。假如今場贏波，慕遜將升上榜首，但教練法夫爾賽前就話冇所謂，反而大讚對手「狼堡」踢法緊密唔易應付。


慕遜加柏受傷停困擾


其實畀着我係法夫爾都擔心啦！事關慕遜今場有中堅保華斯停賽，射手迪甘馬高亦因背傷，肯定連同中堅史蘭斯缺陣，最慘法希爾近排仲懶醒，將前鋒艾迪素踢去些路迪試腳，陣容殘到咁，真係唔係咁易搶分o架！




對家禾夫斯堡今季大事增兵，首仗作客輕取科隆3:0開咗個好頭，上仗對拜仁其實亦佔盡優勢，可惜前鋒希美斯嘅頭槌被誤判詐胡，最後仲臨天光瀨尿輸0:1，認真唔抵。


具滋哲傷韌帶抖3個月


雖然中場具滋哲近日練波時整傷左腳足踝韌帶，至少抖3個月，但呢位南韓國腳一向唔係正選，影響根本唔大。更何況「狼堡」尋日已正式由韋斯咸免費簽入希斯佩加3年，仲畀咗件10號波衫佢着，睇得出非常睇好呢位德國國腳可以幫到手。事實上，希斯佩加以前踢史特加表現唔錯，對德甲根本唔陌生，佢嘅重炮隨時成為「狼堡」今場秘密武器都未定！