漢堡送上門餵拜仁

猪拉多纳

20/08/2011
文： 蘇斯黑柴

德甲重頭戲上演南北打吡，班霸拜仁慕尼黑主場迎戰漢堡，漢堡開咧兩戰表現令人失望，尤其豆腐防線可謂任人魚肉，今晚作客安聯球場擺明等劏，黑柴捧拜仁慕尼黑「讓球主勝」。（有線61及64台周六晚９時30分直播）




漢堡今季放走多名重心，體育主管阿連臣向舊主車路士挖角，但搵嚟一批廉價二線兵，踢落完全唔對路，幾名新兵謝菲布馬、文切尼、高漢托利同史基布特都踢到亂晒龍。




漢堡首戰作客多蒙特輸一比三可以話輸級數，但上仗主場鬥哈化柏林就真係嚇親人，哈化今季回升德甲，呢支首都球會首仗主場輸畀紐倫堡，上半場零射門兼全場零中目標，實力有限，但作客對住漢堡竟然佔盡上風，場波踢成二比二，但哈化埋門鏡頭此起彼落，全場有三次中楣中柱，假如佢哋好運啲，上仗入漢堡五至六球都唔係奇事。


拜仁兵多唔怕輪換


拜仁近期賽程密，啱啱喺周中歐聯附加賽首回合主場贏蘇黎世2:0，下周中又要作客瑞士踢次回合，兼且上仗賽後，前線三叉戟洛賓、列貝利同馬里奧高美斯都因為有傷而缺練，不利因素甚多。不過黑柴認為佢哋對蘇黎世下半場嘅表現已漸入佳境，何況後備席仲有雲拜頓、泰摩斯卓克、湯馬士梅拿同奧歷呢啲既優質亦飢渴嘅副選，根本唔怕輪換，佢哋季前喺電訊盃曾經輸過畀漢堡，今場南北打吡有足夠決心復仇，主場出擊唔只贏一粒。