車路士3.7倍「讓和」抵玩

猪拉多纳

20/08/2011
文： 翁文成

揭幕戰慘食悶棍嘅車路士，今晚重返主場對西布朗，相信實食無黐牙，只係考慮「藍戰士」近排問題多多，仲要近年首仗主場贏波興玩單跳，一年大炒一年小勝，阿成覺得呢場贏一球僅熟嘅3.7倍「讓球和」值得冷吼！（有線200及300、廣東體育周日凌晨0:30直播）


門將施治膝傷抖1個月


車路士今季高薪挖「莫連奴二世」保亞斯執教，擺明挑戰曼聯，點知首周作客就慘遭史篤城悶和0:0，今周重返主場比賽，試問唔贏波點交代？不過「藍戰士」近排都幾黑仔，正選門將施治膝傷要抖1個月，中場約翰米基爾個老竇又被綁架，又連想簽熱刺中場莫迪歷都搞到唔湯唔水。無疑車路士啱啱終於以2,000萬鎊（約2.6億港元）簽入盧卡古，呢位比利時新星今晚可以落場，問題係佢始終加盟冇耐，唔似可以即時起到作用囉！


西布朗射手續約振軍心


西布朗首周主場對曼聯其實表現唔錯，可惜最後因為一個烏龍波輸1:2，阿成都戥佢哋唔抵。好彩西布朗日前終於同射手奧丹維治續約3年，大幅提升士氣，加上領隊鶴臣上年帶領利物浦嗰陣又教過費蘭度托利斯，相信今場會有辦法對付「王子」，車仔要重演上季英超首輪主場大炒西布朗絕對唔易。




事實上，阿成賽前翻查歷史，發現「藍戰士」近年有個驚人數據，原來由05年起，每逢英超首場主場小勝對手後，隔一年必大勝，睇番車路士上季首場主場大勝西布朗，今次可能又縮番，兼且近排被咁多不利消息困擾，今鋪似乎好大機會煲番魚生粥！