蒙彼利埃搵雷恩着數

猪拉多纳

21/08/2011
文： 笛子波童

波童推介法甲波多年，如果要揀一支最冇緣球隊一定係巴黎聖日耳門，或者真係波童眼光差，每次推介呢支首都球隊都令波童跌眼鏡，反佢哋卻又可以贏場漂亮勝仗畀你睇。以為今季大肆擴軍可以爭番一口氣，勢估唔到首輪即於主場爆大冷輸波，上周作客雷恩睇死佢哋，點知又畀球隊執番一分，真係邪到你唔信。




聖日耳門同我唔夾




為免錯落去，今晚聖日耳門主場鬥華倫西恩斯，就算有今夏法甲「標王」、阿根廷中場柏斯托尼正選上陣、球隊剛於歐霸盃大勝盧森堡迪費丹治四比○等有利因素支持，都係避之則吉，推介另一場蒙彼利埃主場鬥雷恩，雷恩近期踢得密，面對兩連勝嘅蒙彼利埃有隱憂，平手盤捧主隊。




（周日晚11時開賽）