保頓唔敢阻老細 曼城客W有計

猪拉多纳

21/08/2011
文： 走肖

保頓今晚喺英超主場對曼城，最近兩隊醞釀「關係交易」，保頓準備以高價賣加利卡希爾，賤價簽入曼城嘅胡禮菲臘斯，點睇都係保頓着數晒，唔通仲敢阻曼城開1.67倍客W咩？（有線200及300、廣東體育周日晚11:00直播）


超低價放胡禮仔


保頓、曼城首周分別以4:0大勝昆士柏同史雲斯，狀態幾對辦，照道理保頓唔會放軟手腳至啱。不過有傳保頓將中堅加利卡希爾吊高嚟賣，大財主曼城照樣肯以1,650萬鎊接收，咁仲未算着數，曼城以200萬鎊放胡禮菲臘斯去保頓，點睇呀？話晒英格蘭國腳喎，唔排除保頓會因為咁鬆章囉。




唔講陰謀論，保頓都好難爆冷，佢哋有李青龍斷腳長抖，新加盟嘅伊高斯有幾多料，大家心照啦。更何況隊長奇雲戴維斯已經34歲，有心未必有力，前鋒卡斯歷經腎病折磨後基本上未好過，射手艾文達同史杜列治又走人，你捧埋我嗰份。


泰維斯專恰保頓


曼城財大氣粗，可能引起部分球迷反感，但新買入嘅射手阿古路，又唔到你唔認佢有料到，而且消息話，隊長泰維斯扭完計離隊後終於肯出戰，以往佢4次對住保頓，個人有3場有波入，總共攻入4球，呢場首次喺曼城同阿古路拍住上，以佢要面嘅個性，肯踢一定唔想失威，有佢幫手客W有計。


保頓對賽輸蝕


‧近5次對賽得1和4負，4次輸波都冇波入。




‧對上4季聯賽主場首戰得1勝1和2負。

曼城連開4口大

‧自都柏林超級盃開始今季連開4場入球大。

‧上季作客成績英超排第2位，取得8勝4和7負。